Haustmote – 5 stilsikre trendar for kvinner
Haustens trendar byr på ein herleg miks av boblejakker, vide herrebukser, strikkavest, fargerikt skinn og spisse skuldrer. Lat deg inspirere!
Sjølv om sumaren sakte, men sikkert går over i ei kaldare og våtare årstid, er det mykje å sjå fram til. Ei av gledene er haustmoten. I år kan du velje og vrake blant boblejakker i alle variantar, grafiske mønster, knallfargar og fargerikt skinn. For å nemne noko.
– Når det gjeld haustens trendplagg er eit godt tips å leggja litt pengar på ein ting, som kan bli med deg fleire sesongar. Då kan du mikse og matche med anna budsjettkjøp, og lata det eine elementet heva eit kvart antrekk, fortel stylist Lene Johansen.
– Det kan til dømes vera ei kåpe, ei boblejakke, dress eller eit par freshe vintersko.
Hausten er òg sesongen for detaljar, og balaklava, kombinasjonen av skjerf og lue, er den største trenden i år. Han gjorde sitt inntog i vinter, og vert med oss vidare inn i hausten.
– Eg ville gått for ein strikka balaklava, og styla han med ei lang kvit ullkåpe og eit par chunky boots, seier Johansen.
Her guidar vi deg gjennom nokre av haustens trendar og gjev deg dei beste stylingtipsa våre.
1. Lat det boble
Denne hausten vert det enkelt å halda varmen, for no er det boblejakker i alle moglege variantar som gjeld. Vi snakkar «oversiza» variantar, lange kåper, korte jakker, knallfarga eller einsfarga. Det boblar rett og slett over av moglegheiter i haust.
Stylingtips
Ei kul boblejakke kan heva eit kvart antrekk. Går du for ei lang kåpe, passar ho like bra til eit par kule jeans som over lange kjolar. Ved å style boblejakka eller boblekåpa med eit belte i midja, framhevar du midja og får ein meir chic stil.
2. Fargerikt skinn
Vi vert aldri lei skinn, og denne sesongen ser vi meir av farga skinn, og gjerne i knallfargar. Både gult, oransje, raudtonar, eplegrønt og limegrønt er trendye fargar i haust.
Det er veldig kult med eit heilt sett i farga skinn. Tykkjer du det vert litt i overkant, kan du gå for eit plagg eller detaljar til eit elles dusare antrekk.
Stylingtips
Kombiner gjerne eit skjørt i fargerikt skinn med ein ullgenser i ein nøytral farge. Du kan òg gå for ein jakke i farga skinn saman med eit par kule jeans og chunky boots – ein trend som også er med oss denne hausten.
3. Spisse skuldrer
Vi har hatt fokus på skuldrer i fleire sesongar, og denne hausten har dei vorte både breiare og spissare. Herredressen har meir markerte skuldrar og ei vidare passform. Skjorter og kjolar har også breiare skuldrer, og gjerne ei spissare avslutning. Spisse skuldrer set prikken over i-en på eit kvart antrekk, og gjev ein kul og edgy look.
Stylingtips
Gå for ein herredress kombinert med ei enkel T-skjorte inni. Tona ned og formelt på same tid! Det er også superfint å kombinere ein collegegenser med spisse skuldrer til anten ei herredressbukse eller eit par jeans.
4. Sølvrev
Sølv osar kjøleg eleganse, fest og disko. Denne sesongen er det sølv som skal få deg til å skine både til kvardags og fest. Går du til dømes for ein sølvfarga overdel, kan det vera lurt å halde resten av antrekket «nedpå», som svarte jeans og minimalistiske detaljar.
Anten du går for ein lekker kjole, eit par sølvfarga sko, eller held deg til ei kul veske – no er det fram med sølvet!
Stylingtips
Endeleg har vi høve å sjå fram til kor vi kan pynta oss skikkeleg att! Våg å pynta deg litt ekstra, og køyr på med ein sølvkjole. Sølvstøvlettar er og ein sikker vinnar. For å skine litt ekstra i kvardagen kan du gå for sølvfarga naglelakk, eller pøse på med sølv-smykke, -armband og -ringar. More is more!
5. Fest med vest
Vi har allereie trykt til oss strikkavesten, og han forsvinn heldigvis ikkje. Denne sesongen utvidar vi repertoaret, og du vil sjå lange, korte, vatterte, fargerike, mønstra og med open front. Boblevesten vert også med oss i haust, og er perfekt å slenge over ein strikkagenser.
Stylingtips
Sleng strikkavesten over ei kvit skjorte for ein klassisk look. Er du svak for 90-tallsstilen, kan du kombinere han med ei t-skjorte. Ein «oversized» variant av vesten passar og perfekt over ein mjuk kjole. Litt varmare, men enda kulare! Kombinerer du ein blazervest med dressbukser, får du eit stilfullt og klassisk antrekk.
